На 25.4.2017 година, во ТЦ „Капитол мол“ се одржа ликовен хепенинг на кој децата од градинките и учениците од основните училишта цртаа на тема: „Ја… сакам Европа“ во организација на Европското движење во Република Македонија, општината Аеродром и Европската делегација во Република Македонија по повод прославата на 9-ти Мај, Денот на Европа.
На крајот од настанот наградите ги доделија шефот на Мисијата на ЕУ во Република Македонија, Самуел Жбогар, градоначалникот на Општина Аеродром, Ивица Коневски и претседателката на Европското движење во Република Македонија, Милева Ѓуровска. Настанот го збогати уметникот Цветин кој ги охрабри младите сликари истовремено и самиот тој насликувајќи бројни цртежи со цветчиња како порака за мир кои потоа им ги подари на присутните.
За најдобра ликовна творба во категоријата од предучилишна возраст е избран цртежот на ИВА МИНОВА од градинката „Срничка“ објект „Црвенкапа“.
Во категоријата од одделенска настава за најдобар е избран цртежот на ФИЛИП КОСТАДИНОСКИ од Vв од ООУ „Димитар Македонски“.
Осмоодделенката МОНИКА СТОЈКОВСКА од VIII2 од ООУ „Браќа Миладиновци“ е избрана за најдобра во категоријата од предметна настава.
Цртежите од ликовниот конкурс, како и наградените творби, ќе бидат изложени во трговскиот центар „Капитол мол“ до 9 мај.
Целта на оваа манифестација е не само да се развие детската уметничка креативност и инвентивност, туку и младата популација од Општина Аеродром да се приближи кон европските вредности.